Igualdade e Participación Cidadá promove o I Concurso escolar de debuxo e pintura “Xaque á violencia de xénero”

A Coruña, 28 de abril de 2010. A Concelleira de Igualdade e Participación Cidadá, Margarida Vázquez, presentou o I Concurso escolar de debuxo e pintura “Xaque á violencia de xénero”, unha iniciativa destinada a impulsar a coeducación en valores igualitarios e a implicación de toda a sociedade na loita contra a violencia de xénero. Vázquez convidou a todos os nenos e nenas escolarizados da nosa cidade da Coruña a participar no concurso, que ten por obxectivo “estimular a capacidade creativa dos nenos e nenas e potenciar as súas habilidades artísticas, ao tempo que coa realización dos seus debuxos se impliquen na loita contra a violencia de xénero e a favor dunha sociedade igualitaria tanto para homes como para mulleres”.

O concurso se enmarca na celebración da unha xornada de partidas de xadrez simultáneas baixo o lema “Xaque á violencia de xénero”, que se desenvolverá nas instalacións do Centro Comercial Los Rosales o próximo 8 de maio a partir das 17:00 horas organizado por o clube de xadrez Mijail Tal, en colaboración co Centro Comercial Los Rosales e a Concellaría de Deportes do Concello da Coruña.

Margarida Vázquez sinalou a importancia da implicación social na eliminación deste tipo de violencia, da participación dunha institución coma o Concello da Coruña ou de entidades privadas coma o Centro Comercial Os Rosales, nunha actividade dirixida aos máis cativos como estratexia de coeducación transversal en valores. “Imos ver as imaxes que as nenas e nenos da Coruña teñen da loita contra a violencia de xénero”. Ao final da súa intervención resaltou tamén novemente a achega neste sentido do Centro Comercial Os Rosales ou da Mari Carmen Fernández, árbitro internacional de xadrez. Ésta última destacou as case 80 inscricións xa confirmadas para a partida simultánea que ela desenvolverá, sendo convidados todos os Centros escolares da cidade a participar neste concurso que pretende dar aínda máis realce tanto a esta actividade como á intención principal deste acto.

BASES DO CONCURSO DE PINTURA

Os nenos e nenas interesadas poderán participar neste concurso de dúas formas:

1. Concurso individual:

Poderán participar todos os alumnos e alumnas incluídos nas siguientes categorias de idade:

Benxamín.............................................de 5 a 8 anos

Alevín...................................................de 9 a 11 anos

Infantil……...........................................de 12 a 14 anos

Recibirán trofeo as cinco propostas mellor valoradas en cada unha das diferentes categorías.

2. Concurso escolar:

Poderán participar todos os centros educativos da Coruña que presenten unha obra colectiva realizada por alumnos e alumnas que en todo caso se sitúen entre os 5 e os 14 anos.

A proposta artística versará sobre a loita contra a violencia de xénero e os desexos dun futuro de igualdade real para homes e mulleres. Esta proposta debe incluír obrigatoriamente un lema ou título visible.

O Xurado, seleccionado pola Concellaría entre persoas de relevancia social e artística da nosa cidade, valorará tanto o texto ou lema escollido como os debuxos e pinturas. Éstes serán presentados en cartulinas de tamaño estándar (50x65) no Centro Comercial Los Rosales antes das 17:00 horas do 8 de maio.

Premios

Haberá trofeos para os cinco mellor clasificados do concurso individual e escolar. No caso do concurso individual, os traballos seran avaliados en cada unha das tres categorias diferenciadamente.

Os traballos presentados permanecerán expostos no espazo onde se desenvolverán as partidas simultaneas de xadrez, que terán lugar no centro Comercial Los Rosales o día 8 de Maio de 2010, a partir das 17:00 horas. No desenvolvemento das partidas daranse a coñecer os premiados en cada categoría.

Datos a incluír no anverso da cartolina:

1. Concurso individual:

Nome e apelidos da autora ou autor.

Colexio

Idade

2. Concurso escolar:

Nome do Centro

Autores e autoras

Idades dos autores e autoras

Información e inscrición para xogar as partidas de xadrez e para o concurso:

Teléfono 609873358

Email: partidasolidaria@gmail.com

E tamén entrando no banner deste noso blog blog Igualdade Coruña

Foro de debate: Cosmética e estética

As actrices Penélope Cruz, Mo`Nique e Julia Roberts veñen de escandalizar a sociedade benpensante de Hollywood, e por extensión a toda a occidental, coa súa férrea defensa do vello feminino, isto é, dunha política estética da non-depilación. A idea xenerou moitísimos máis rexeitamentos que apoios, mesmo entre o conxunto das mulleres, se ben son cada vez máis as actrices xóvenes de Hollywood que se apuntan a esta defensa. Mulleres consideradas universalmente belas e que defenden un outro modelo de beleza alonxado dos cánones actuais.

A nosa Concellaría, a través do Proxecto DESENFOCADAS, analizou os contidos das revistas dirixidas a rapazas novas, atopándose con condicionantes esaxerados de corte estético desde moi temprana idade: pernas curtas ou longas, brazos curtos ou longos, orellas grandes ou pequenas, colo estreito ou ancho, cadeiras prominentes ou escasas, peito avultado ou plano, porosidade evidente no pel da cara, coloretes ou palidez......Todos estes condicionantes levan asociados produtos, cosméticos ou estéticos, que son incitados para o seu consumo. Cando estas rapazas crecen, as publicacións dirixidas ao público adulto reinciden na mesma temática prácticamente ata a vellez.

Actualmente, as publicacións masculinas máis sonadas comezan a introducir elementos como a depilación, a musculación, o ton do pel, as tatuaxes, as bolsas dos ollos, a falta de pelo na cabeza.....Son todos eles condicionantes masculinizados asociados tamén a produtos cosméticos e/ou pretendidamente naturais.

E isto último un auténtico sinal de igualdade real? Éo talvez a defensa desas mulleres do seu vello feminino? Vivimos realmente condicionados por estes estereotipos estéticos? Son obrigas reais nacidas dos nosos reais sentimentos para co sexo que nos atrae? Cara onde camiñamos?

Participade neste espazo

Unha muller coruñesa consegue un fito histórico grazas ás xestións do noso CIM

Unha muller da Coruña que foi vítima de violencia de xénero conseguiu que a Xunta de Galicia recoñecese o seu dereito á percibir a subvención da bolsa de alugueiro de xeito independente da subvención que xa percibira o seu ex esposo condenado por malos tratos.

A esta muller se lle comunicara que non tiña dereito a subvención da bolsa de alugueiro por ter esgotado o plazo máximo subvencionable.

Asesorada e apoiada dende a equipa do Cim da Coruña, presentou recurso e logrou que a Xunta modificara o seu criterio recoñecendo o seu dereito a que se lle computen os anos de subvención de xeito individual e abrindo as portas a outras mulleres que terán algo más facil a súa independencia dos agresores.

Grande acollida á inauguración da Ludoteca de Novomesoiro

Como era de agardar nun barrio tan xoven e con tantos cativos e cativas como Novomesoiro, os peques foron os auténticos protagonistas da xornada inaugural e, como non podía ser doutra forma, a súa Ludoteca. Este novo espazo que forma parte do Servizo de atención á infancia que ten posto en marcha a Concellaría de Igualdade e Participación Cidadá dentro do macro-programa "Concilia os teus tempos" engádese aos xa existentes no Centro de Formación dos Rosales, no Centro Cívico de Monte Alto e no Centro Cívico do Castrillón.

Segundo as cifras facilitadas polas magníficas monitoras da empresa Vitae encargada de xestionar esta Ludoteca, un total de 80 rapaces e rapazas pasaron por alí nas tres horas que durou a festa de inauguración, sendo os máis pequerrechos os amos da pista e do inchable alí instalado. Todo un récord que amosa cómo nestes espazos se poden acoller a un número importantísimo de usuarios ao longo do tempo que se presta o servizo sen custe algún para os proxenitores e cunha moi ben estudada relación entre a calidade do servizo que se presta e o custe para o Concello, que somos todas e todos.

O próximo sábado 24 de abril, entre as 10:30 e as 13:00 horas que se celebra o Foro de Participación de Novomesoiro para a programación de actividades do Centro, estarán novamente estas rapazas e o seu inchable para todas aquelas persoas que se queiran achegar a esta cita veciñal imprescindible de cara á posta en marcha inmediata da actividade regular deste novo Centro. Agardamos contar con tod@s vós!!!!

Rede de Centros da Concellaría de Igualdade e Participación Cidadá

A Concellaría de Igualdade e Participación Cidadá dispón actualmente, para o desenvolvemento das súas políticas, de toda unha Rede de Centros especializados ao que se engadiron recentemente novas unidades.

En primeiro lugar, na Rúa Hortensias s/n do Barrio das Flores, o CIM-Centro de Información ás Mulleres oferta unha completa atención que comprende os apartados xurídico, psicolóxico e laboral. A maiores disto, desde estas instalacións desenvólvense diferentes programas de coeducación -obradoiros de Igualdade para o programa "Aprender en Coruña"-, corresponsabilidade, conciliación -o programa "Concilia os teus tempos" que comprende o Servizo de atención á infancia, o Banco de tempo e o Plan de programación do tempo-, programas de integración para poboación inmigrante extracomunitaria -Programa ADA- e moitas das actividades formativas e conmemorativas tanto do 8 de marzo como do 25 de novembro.

Desde o Centro Municipal do Birloque, de recente apertura, desenvólvense programas de reforzo do entramado asociativo, voluntariado -Mediación Veciñal- e Orzamentos Participativos. Tamén é un referente á hora de xestionar os contidos da nosa web de Igualdade e Participación Cidadá de moi próxima aparición.

O Centro Cívico e Social de Mesoiro, tamén denominado Centro Cívico de Novomesoiro, cunha xestión novidosa compartida entre a nosa Concellaría e a de Srvizos Sociais, conta cun espazo para a conciliación como é a súa Ludoteca ademais de desenvolver políticas de Participación Cidadá e de relación co entramado asociativo máis próximo. Para isto, levamos desenvolvido unha campaña participativa en continuo contacto cos veciños e veciñas da zona e que culminará o próximo sábado 24 de abril coa realización do I Foro Veciñal de Novomesoiro de cara á programación das diferentes actividades deste Centro.

De cara ao próximo ano está previsto inaugurarse un complexo na Agra do Orzán ao abeiro do URBANA-C da Unión Europea, que incluirá un Centro de Día, unha Escola Infantil e a Casa das Mulleres, un espazo duns 800 metros cadrados entendido como centro de referencia para a documentación e as novas tecnoloxías para as políticas de Igualdade. Este complexo estará ubicado na urbanización do Parque da Agra.

Por outra parte, a Concellaría de Igualdade e Participación Cidadá conta cunha Rede de Acollemento para a atención de mulleres vítimas de violencia de xénero e/ou en especiais dificultades. Unha Casa de Acollida, tres pisos tutelados e unha vivenda con apartamentos forman parte desta completa Rede.

A estes Centros hai que sumar a oficina que a nosa Concellaría xestiona desde o Palacio Municipal de María Pita para aplicar políticas de proximidade cos cidadanía e os tres espazos cedidos polas Concellarías de Promoción Económoca e Emprego e Servizos Sociais no Centro de Formación e Emprego, no Centro Cívico do Castrillón e no Centro Cívico de Monte Alto onde se está desenvolvendo o noso Servizo de atención á infancia, ao que se vai sumar un novo espazo no Centro Social da Sagrada Familia.

Toda unha Rede e toda unha responsabilidade.

Festa de inauguración do Centro Cívico e Social de Mesoiro

Hoxe é un gran día para os barrios de Mesoiro, Feáns e Novomesoiro, xa que ás 18:00 horas quedará inaugurado o novo Centro Cívico e Social de Mesoiro, centro participativo, igualitario e social que dará servizo a estes barrios da periferia coruñesa. O acto contará con actuacións de corais e gran guateque oitenteiro.....por alí estaremos, non faltaba máis!!!!!!!

Coincidindo con este acto, a Concellaría de Igualdade e Participación Cidadá inaugura á súa vaz a Ludoteca do Centro. Un espazo exemplar adicado aos máis peques do barrio. Así poderemos ver cómo queda esta fabulosa sala co mobiliario adquirido ao efecto....e tamén servirá para que os papis e mamis poidan acudir á festa coa tranqiuilidade de saber que os seus pequerrechos terán tamén o seu.......

En fin....noraboa e a pasalo ben!!!!!!

Batucadas feministas: ritmos de liberdade!

Pasamos a información enviada pola Marcha mundial das mulleres na Coruña relativa a unha nova actividade que van desenvolver no Centro Veciñal de Pescadores.

Batucadas Feministas: Ritmos de Liberdade!

As batucadas feministas: ritmos de liberdade! é unha iniciativa que xurde dun grupo de mulleres novas da Marcha Mundial das Mulheres no Brasil como parte da campaña "O meu corpo não é mercadoria!". Construíron os seus instrumentos con materiais reciclados e ensináronse as unhas as outras para poder batucar ao ritmo e visibilizar as súas reivindicacións con enerxía na rúa.

Na Coruña propoñemos iniciar o noso propio proceso coa xente interesada para achegar o feminismo á poboación através da música, língua universal, e pois, para pasar tamén un rato divertido e creativo.

Este sábado 17 de abril, ás 11 da mañá reunirémonos no Centro Cívico de Pescadores (Rúa Cangas do Morrazo, 17) para construír conxuntamente o grupo de batucadas no que todas aportaremos coñecementos sobre música, sobre iniciativas de batucadas noutros lugares, de cómo facer instrumentos con materiais reciclados, falaremos de feminismo e moitas cousas mais, e teremos a nosa primeira aula de percusión con Cristina Asenjo. A partir de aí e entre todas deseñaremos as futuras reunións nas que nos iremos autoformando e creando así as nosas propias batucadas.

Se queres participar achégate ao Centro Cívico Pescadores o sábado 17 ás 11:00 ou contacta coa Marcha Mundial das Mulleres na Coruña en marchacorunha@gmail.com

IMPORTANTE!!! Trae calquera cousa coa que podas batucar, con un cubo, unha lata, unha pota, unha pandeireta, unha caixa de sapatos, ou de galletas, unha garrafa de plástico ou vidro...e un ou dous paos, de momento será suficiente.

Todas benvidas e a batucar!!!!

Para chegar ao centro cívico Pescadores, ide ata o cruce da Ronda de Outeiro coa rúa Almirante Mourelle, ali veredes a Axencia Imobiliaria "Luz", meterse por esa rúa (Almirante Mourelle) e no final da mesma virar para a direita na rúa Antonio Pedreira Ríos, baixar 10 metros e virar á esquerda na rúa Cangas do Morrazo. Verás unha praza en forma de U, o Centro Cívico é o edificio Central.

Podedes ver a localización AQUÍ:

Ver mapa maior

Presentada a programación completa do MUAU

Entrar no MUAU AQUÍ

Hoxe presentouse a programación completa do MUAU, que se celebrará na Coruña durante os meses de abril, maio e xuño. Durante a rolda ante a prensa, María Xosé Bravo, Concelleira de Cultura do Concello da Coruña, Fernando Prieto, da Fundación CaixaGalicia, Xulio Vázquez, de Deica Management e Quique Tello, Primeiro Tenente de Alcalde da Coruña, expuseron e valorizaron o conxunto de actuacións e actividades que se desenvolverán na Coruña os próximos tres meses. En concreto, Fernando Prieto considerou que a nosa cidade pasaba a ser a capital estatal da arte urbana sen ningún xénero de dúbida. A Concelleira de Igualdade e Participación Cidadá, Margarida Vázquez, asistiu como concellaría colaboradora dunhas actividades que se desenvolverán entre maio e xuño e das que xa vos falaremos.

Intervención de Quique Tello


Seguiremos moi pendentes destas xornadas interdisciplinares.

O Concello ofertará tres vivendas tuteladas para mulleres maltratadas antes do remate de 2010

O día de hoxe é un día especial para os medios de comunicación impreso na nosa Comunidade Autónoma, xa que é un dos tres únicos días do ano en que non se publican nin estás dispoñibles nos diferentes puntos de venda debido á festividade de venres santo, día non laboral para as e os xornalistas. Os exemplares publicados onte venres, 2 de abril, son os únicos dos que dispoñemos hoxe sábado, 3 de abril. Por isto, resulta para nós especialmente significativo que se dea conta en dous medios diversos de dous temas diferentes tratados pola nosa Concellaría.

Por unha banda, no Ideal Gallego, podemos ler unha completa información redactada por Ángela Fernández onde se destaca a inminente posta en marcha da Rede de Acollemento do Concello da Coruña, onde á actual Casa de Acollida sumaranse tres vivendas tuteladas para aqueles casos onde sexa máis necesaria e conveniente que estas mulleres vítimas de violencia conten cunha importante autonomía e independencia e, polo tanto, autoresponsabilidade exercida a respecto das súas propias vidas e das persoas, normalmente menoras, que as acompañan. Toda unha boa noticia da que daremos conta no seu momento.

Por outra banda, a Opinión da Coruña fai balance das políticas de Participación Cidadá destacando, como é de esperar sempre nun medio de comunicación a respecto do conxunto dos poderes públicos, aqueles aspectos aínda pendentes da súa posta en marcha, como son a nova división da Coruña en catro ou seis Distritos ou a posta en marcha do renovado Consello Social da Coruña. Neste longo artigo, Margarida Vázquez destaca as dificultades de implementar unha auténtica cultura de participación cidadá nunha cidade como A Coruña, se ben destaca os logros obtidos no que vai de mandato a respecto desta, como son o plan Urban, a Rede Coruña Emprega, a Mesa Sectorial de Comercio, o Foro de Participación ou o Foro da Mocidade, entre outros. Recomendámosvos, polo tanto, a leitura destes dous traballos e recordámosvos e respecto deste último aspecto que tedes aberta unha enquisa no blog Participación Coruña onde, precisamente, propoñemos expresedes a vosa opinión sobre se A Coruña conta actualmente cunha completa cultura de participación que abrangue a todas as partes implicadas ou, pola contra, esta cultura é máis matizable ou mesmo nula.